السلام عليكم ورحمة الله و بركاته
الحياة ما عاد تنطاق بكل …
معقولة … هكي؟
شن في يا راجل خير؟
كيف شن في أنت ما تندريش بكم ستيكة الدحي توة؟
لما تجي تشكي من غلاء سلعة ... و أنت قادر تستغني عنها ... لكن تشري فيها و تستمر هي في إستهلاكك و تكون أنت المتضرر من الناحيتين ...
و الرابح هو التاجر الي يشتغل على انك مش قادر تكبح شهوتك و رغبتك و قلة إدراكك لإمكانية الإستغناء عن الأشياء بإرادتك …
تقول الدحي بستة دينار لا بستة جنيه … باهي بستة جنيهات … و دنانير …
جربوا مثلا … بس مثلا … بدون ردة فعل في غير محلها … مثلا يعني … نص طرابلس سكانها يوقفو يشرو دحي لمدة أسبوعين أو ثلاثة ممكن حتى أكثر … وشوف شن بيصير فيه الدحي …
وبتقول شن نأكل و شن بنوكل صغاري؟
كول زميتة ... خبزة وزيت وسكر ... دير سندوتشات طماطم حكة زي زمان ... دير بسيسة وتمر ... دير سحلب ... مرقة ماجي وغمس فيها ... مثرودة ... دشيشة … فول مدمس ولا فول مدشش … حمص … وكلها فيها بروتين
و أكيد جايك رمضان و تبي السفرة الي هي …
يعني هو في قرآن منزل من عند الله يقول لك لا يصح الصيام إلا بوجود البوريك والبيتزا و المبطن على سفرة الإفطار؟
أم أنك آثم إن لم تأكل البيض؟ و مصيرك إلى جهنم و العياذ بالله و انت مصر عليه كأنه في شي هكي؟
الصغار مش حجة لأنهم يتعودو يأكلو ما تعطيهم وفي أكل واجد يعوض البروتينات و المعادن الي محتاجينها مرات اكثر من الدحي الي مرات ما فيه دحي أساسا … فما أديرهم سبلة و كأنك تقول هم الي يبو مش أنا نبي و أنت مش قادر تقاوم شهوات بطنك و رغباتك … و الدحي مجرد مثال …
لكن الهدف أنك تقاطع وتمتنع وتكون قوة إجتماعية تضغط على التاجر الي تكسد بضاعته فينزل السعر ... هو الهدف ...
إنك تستغلها فرصة تعلم بها صغارك أنهم ما يكونو عبيد بطنهم ، و تربطهم شهوتهم ، و انهم يقدروا يكتفوا بالقليل من الطعام و لا يكفيهم من طعام العقل شيء … العلم …
نعرف ان الي نقول فيه يعتبر خيال علمي غير مقبول في مجتمعنا النزيك ، و الغالبية تبي أن يتوفر لها كل شيء في أي زمن و في أي ظروف ، وما نفكر في أن الإنجاز يحتاج إلى بعض التضحية …
وهل تقدر تسمي استغناءك عن شراء البيض و مواد غذائية ثانية تضحية؟
ولا أنت من الناس الي ما تعرف عن التضحية إلا الإستغناء عن الحاجات الي ما تبيها ؟ و التضحية مش قتل و روح و دم و رصاص و بس … لكنها إحساس … بحاجة الكل و حاجتك معاهم ، و التعاون عليها و على تحقيقها
ضحي شوية بشهواتك الي تاكل في بطنك و تعاونوا الكل ليكون رمضان هذا بلا بيتزا ولا بوريك ولا بيض … و نشوفو حاجات اخرى … و الأسعار حتنزل بشكل كبير جدا …
شن تقول انت ؟ كيف نقعدو من غير بوريك و بيتزا تي ما يصيرش منها الدوة هذه … الحكومة هي الي لازم ادير حل
تي حتى حكومة اكبر دولة في العالم ما تدخل في الاسعار يا همي ، الناس هي الي تقبل و لا تعرض على السلع فتزيد السعر و تنقصه …
أهذي … نعم أحلم … و بالاصح على التهدريز الي هكي … أن نتفق نحن البسطاء على ان نحتفظ بأموالنا في جيوبنا … ايه يا حاج ايه … ارفس …
الواقع يقولها و يرددها و يعيدها ولكن كثير منا لا يسمع … نحن لا نريد أن نصبر ولا نريد ان نضحي ، ولا نريد أن نتعاون … نعم لا نريد … و إن أردنا لاستطعنا خلال اسبوع واحد … تخفيض سعر البيض و كل السلع المهمة و الضرورية إلى أقصى ما نستطيع … و عندها نكون قوة موحدة … و البيض و البوريك و البيتزا … لم تذكر في القرآن ليصح بها الصيام … أو ان تصح بها الحياة …
كيف كانو يقلو فيه الدحي زمان في الصحراء لما كان التمر هو الاساس في الاكل … ؟
صح كيف كانو يقلو في البوريك زمان على أيامهم و كيف كانو عايشين من غيره؟
شكراً…
