السلام عليكم و رحمة الله و بركاته
الشباب ... هم الوقود الذي ترقى به الأمم... الشباب هم أمل الغد... هم عماد المستقبل...
لو سمحت ممكن ترجع تتكلم منطقي و تبعد عن شعارات المطويات و المؤتمرات الفارغة؟
طيب سامحني نسيت نفسي شوية ...
ذاك الشاب المثابر الذي أفنى وقته في السعي لتحقيق حلمه...
عفوا لو سمحت ممكن تحكي فلاقي خلي نفهموك كلنا؟
كيف ما تفهم بالفصحى؟
لا بس الكلام يقعد كأنه ورقة تقرا فيها قدام رئيس تبي توريه أن في ظل حكمه كل شي ماشي تمام ... فخليك فلاقي خير بالك رسالتك توصل بسهولة أكثر...
ماشي يا سيدي ولا تزعل نفسك...
انت عارف ان كل يوم و الثاني طالع لنا خبر يقول الشاب كذا قدر ينتزع النجاح كذا في بلد كذا من فم الأسد كذا و هزم كل المنافسين الي كانو معه في نشاط كذا ...
ايه هذا شرف كبير لنا و لبلادنا ... الواحد يفرح لما يشوف ولد بلاده ناجح في العالم
هو شرف ولا إهانة في رأيك؟
أكيد شرف لما ولد بلادي ولا بنت بلادي تطلع و تبيض وجه البلاد خلي يعرفو ان بلادنا مش دم و قتل و بس و ان فيها ناس قادرة تحقق نجاحات...
كلامك جميل بس مش معقول لأنه عاطفي وبس ، و المفترض أنك تزعل لما تسمع حاجة زي هذه مش تفرح ، وإن كنت بتفرح للشخص لكن تزعل لك و للبلد الي انت فيها...
تي كيف نزعل تي هذا شي يشرف...
يشرف لما يكون النجاح هذا صار عندك هنا وتكون دعمته ، مش يكون هرب منك لأنه فشلته و حاربته وعرقلته وسكرت في وجهه الأبواب بكل ما اوتيت من قوة و أهملت و ما دعمت و بعدين لما هرب من عندك لقا الطريق أبسط وأسهل فحقق نجاحه... تجي تقولي فرحت به ...
ليش ما نسمعش منك في نجاحات تمت في بلدك في وسطك الي كأنه وسط تكاثر فيروسي بالنسبة للنجاح واي خلية ممكن يصير منها أو أي برنامج طموح يمكن يصير منه يلقى عراقيل توقف قدامه وما يكمل وحتى أسرته ومحيطه المقرب يهزا عليه ، أي نعم العالم كله في بداية كل شخص يلقى من يهزا عليه ولكن لما يكون المجتمع كله ضده وتكون البيئة طاردة بدلا من كونها بيئة جاذبة وقتها ما يكون فيها فخر ان الشخص الي طرداته البيئة هذه نجح في غيرها... وقتها يكون مؤلم أنك تشوف النجاحات تصير في خارج بلدك ومافيها ما يفرح... و الحاجة الوحيدة الي ممكن تفرح بها ان في شخص صبر وثابر ونجح لنفسه ، فقط لنفسه وهذا غير ان نجاحه هذا نسبي و لحظي وياريت يكون نجاح فيه رفع راية الإسلام مش رفع راية هز الوسط و الرقص ولا حاجات ممكن تكون بعيدة عن الدين نهائيا ، وما تقولي لا هكي العالم يخدم توة وهذا الي يلفت في انتباه العالم ، نقولك ان ربي موجود في كل وقت وما تغيرن الأوامر ولا تغير المفروض عليك ولا حيتغير ليوم نجتمع جميعا في يوم الحشر... وعيب أنك تخلي بيئتك طاردة و تفرح بالي هرب منها و نجح... عيب ...
تي باهي وانت قلبتها لي مناحة تقول القيامة بتقوم بكرا...
ايه قيامتك تقوم يوم موتك و تعرف امتى بتموت أنت؟
بالله فكني خلاص أنا فرحان أن اي ليبي يدير اي حاجة في العالم... لكن بجد كان نلقى ولد جارنا الفطحة يطلع يشارك في مسابقة أحسن درباك في العالم...
عادي تبي نديرو له حملة نلقطوله فلوس عشان يشارك مافي مشكلة بكل... مادام نجاحه يفرحك وبالك يرجع لنا درباك على مستوى العالم يطبل في الساحة و الشعب يرقص...
فيق بالله عليك وانتبه لأننا بدينا نخوض مع الخائضين وتجاوزنا جحر الضب غادي هنك بعيد بكل ...
ولو تبي نجاح حقيقي تفخر به على مر الأجيال وتفخر به أكثر يوم يسألك ربي شبابك فيما أفنيته...
أنت تعرف شن المفروض ادير صح؟ مافي داعي نطولو المنشور أكثر من هكي ... ولا إله إلا الله... محمد رسول الله
شكرا...
